بعد قرار وزير التربية والتعليم .. تعرف على اليوم الرياضى بالمدارس وهل اليوم الرياضي سوف يكون إجازة بالمدارس
اليوم الرياضي بالمدارس ...
س1/ هو صح في يوم رياضي فى المدارس؟
ج/ اه في يوم رياضي ويوم فني ثقافى بالتناوب.
س2/ يعنى إيه بالتناوب؟
ج/ يعنى اسبوع يوم رياضي وأسبوع يوم فني ثقافي.
س3/ اليوم الرياضي هيكون إجازة ؟
ج/ لا مفيش إجازة للمدارس
س4/ هيكون يوم موحد في كل المدارس في نفس اليوم؟
ج/ لا مش هيكون يوم موحد ف كل المدارس ولا كل الصفوف بالمدرسة في نفس اليوم..
ده هيكون كده يوم ترفيهي - لا دروس - ولا حصص - ولا فصول.. هيبقى يوم رياضي الأسبوع ده.. يوم ثقافي الأسبوع اللي بعده.. الطلبة تلعب كورة تلعب سلة تلعب طايرة يدخلوا المكتبة.
س5/ هل الطلبة تطلع الصبح من البيت عالمدرسة؟
ج/ الطلبة يطلعوا من البيت الصبح على مركز الشباب والمدرسين يروحوا لهم على هناك.. هيكون فيه جدول في كل مدرسة لكل صف متحدد في الجدول ده اليوم الرياضي أو الفني أو التثقيفي ده هيكون إمتى وفين..
س6/ ليه الوزارة عايزة تعمل يوم رياضي فنى ثقافى؟.
اليوم ده معمول علشان الطالب يفصل شوية.. علشان لو فيه موهبة فنية رياضية ثقافية.. يعني هيتعمل مسابقات رياضية بين المدارس، ويجيبوا فرق تحكيم، ووزارة الشباب والرياضة هتجيب ناس من عندها تكتشف مواهب رياضية وهكذا..
س7/ طب والمنهج والحصص والمدرسين هل هيضغطوا الجدول؟
ج/ ده بيترتب حاليا وبيتحط خريطة للمنهج والجدول معمول فيه حساب اليوم الرياضي ده..
س8/ إيه رد الوزارة عالمعترضين للكلام دا ؟
ج/ الرد سهل وبسيط ...
سيبوا الطلبة تفصل شوية.. وبعدين مهي أي مدرسة حضرتك نفسك تدخل ابنك فيها، بتعمل يوم زي ده ويكاد يكون اليوم اللي الطالب مستحيل يغيب فيه عن المدرسة.. آه لازم تعليم، بس لازم شوية الطالب ياخد نفسه ويشوف نفسه.. ما انت عندك متفوقين تعليميا ورياضيا في نفس الوقت..
هونوا على نفسكم وعلى ولادكم، التعليم مش حرب ولا معركة.. التعليم عمره ما كان لا بالضغط ولا بالترهيب.
